叻仔貓 B

因為貓奴哥哥姐姐無暫託經驗, 仲要今次係照顧病 B, Ray 哥哥好好人咁分擔湊 B 工作, 上星期接 o左銀灰色 o個對仔女去佢度。哥哥姐姐就專心湊 o個隻打針時鬧人同輾蓆 o既細 B。

細 B 康復得算快, 個零星期 o的毛已經靚返哂, 眼仔又好返, 精靈爛玩, 見到哥哥會 o係籠入面跟住哥哥行來行去, 姐姐嗌佢佢識喵住 o黎應姐姐, 見到籠頂枝逗貓棒仲會想爬上籠攞枝貓棒添 ~~~

尋日哥哥姐姐又帶細 B 去 Dr. Betty 度 check 多次, 細 B 一出貓袋就同 Dr. Betty 玩, 仲打呼嚕, 氹到 Dr. Betty 好開心。Dr. Betty 就話佢靚仔, 係瘦弱 o左 o的, 要谷返肥佢, 無乜其他大問題, 俾心機湊佢就可以, 唔駛太擔心。

原來細 B 係蘇格蘭摺耳, 仲要係摺 o左耳仔咖啦 ~~

細 B 快 o的食多 o的o野, 健健康康, 快高長大。好想快o的俾你見 o下仔仔露露, 開開心心一齊玩。